करोना: युरोपमध्ये बहुतांशी देशांतील लॉकडाउन उठवला!

पॅरिस: करोना विषाणूचा सर्वाधिक फटका बसलेल्या युरोपीयन देशांमध्ये सोमवारी अनेक शहरे खुली झाली. फ्रान्स आणि बेल्जियम यांनी देखील लॉकडाउन उठवला. नेदरलँडमध्ये विद्यार्थी शाळेत जाऊ लागले आहेत. तर, ग्रीस आणि स्पेनमध्ये निर्बंध आणखी शिथिल करण्यात आले आहेत. अर्थव्यवस्थेला उभारी देण्यासाठी या देशांनी निर्बंध शिथिल केले असले, तरी करोनाचे संकट दूर झालेले नाही.

विविध शहरांमध्ये नागरिक तोंडाला मास्क लावून फिरताना दिसले. सुरक्षित वावर राखण्याचे नियम पाळताना दिसत होते. सार्वजनिक वाहतूक आणि शाळांमध्ये हे नियम कसे लागू होतात, याचे मात्र आव्हान आहे. फ्रान्समध्ये लोकांना घरातून बाहेर पडताना आवश्यक असलेले अर्ज नसले, तरी आता चालणार आहेत. मात्र, पॅरिसमध्ये अवघ्या काही तासांत मेट्रो स्टेशन्सवर गर्दी उसळली. लॉकडाउन उठवला असला, तरी लोकांना त्यांच्या प्रादेशिक भागातच ठेवण्याचे मोठे आव्हान प्रशासनासमोर आहे. पॅरिसध्ये सलूनवाले प्रत्येक ग्राहकाकडून करोनापासून बचावासाठीच्या पोशाखाचे पैसे आकारणार आहेत. जुनी कार्यपद्धती पूर्ण बदलणार आहे. ग्राहकांच्या अपॉइंटमेंट्स निम्म्यावर येणार आहेत. ग्राहक चैन म्हणून नव्हे; तर गरज म्हणून या ठिकाणी येतील, अशी प्रतिक्रिया एका ब्यूटिशियनने दिली.


स्पेनमध्ये जवळपास निम्मी लोकसंख्या निर्बंधांतून बाहेर येणार आहे. रेस्टॉरंट, बार उघडणार आहेत. येथील माद्रिद आणि बार्सिलोना ही शहरांत मात्र, लॉकडाउन कायम राहणार आहे. जर्मनीमध्ये करोनाच्या नव्या रुग्णांची लाट येण्याच्या भीतीमध्ये नागरिक आहेत. दक्षिण कोरियामध्ये एका नाइट क्लबमध्ये येणाऱ्या ग्राहकामुळे ८५ जणांना संसर्ग झाला. तसेच, चीनमध्ये वुहानमध्येही ही नवी लाट येत आहे. या नव्या लाटेमुळे दक्षिण कोरियातील शाळा अद्यापही बंदच आहेत. जर्मनीमध्ये जिम सुरू झाल्या आहेत. करोनासोबत जगण्याचे आव्हानाला सामोरे जावे लागेल, अशी प्रतिक्रिया तेथील आरोग्यमंत्री ऑलिव्हियर व्हेरन यांनी दिली. पर्यटनव्यवसायावरीलही मळभही काही प्रमाणात दूर झाले आहे.



ब्रिटनमध्ये आता 'स्टे अलर्ट'

अमेरिकेनंतर करोनामुळे सर्वाधिक मृत्युसंख्या असलेल्या ब्रिटनमध्ये हळूहळू निर्बंध शिथिल करण्यात येणार आहेत. 'स्टे होम'ऐवजी 'स्टे अलर्ट' हे नवे घोषवाक्य ब्रिटनमध्ये सरकारने स्वीकारले आहे. ज्यांना घरातून काम करणे शक्य नाही, त्यांनी कामावर जाण्यास प्रोत्साहन दिले पाहिजे, असे पंतप्रधान बोरिस जॉन्सन म्हणाले.

अमेरिकेत ३.३५ कोटी बेरोजगार

अमेरिकेचे अर्थमंत्री स्टिव्हन नूचिन यांनी या वर्षाच्या दुसऱ्या टप्प्यात अमेरिकेची अर्थव्यवस्था पुन्हा उसळी घेईल, असे म्हटले आहे. बेरोजगारीचे प्रमाण या ठिकाणी वाढले आहे. गेल्या आठवड्यात ३२ लाख अमेरिकी कर्मचाऱ्यांनी बेरोजगारीच्या भत्त्यासाठी अर्ज केला आहे. बेरोजगारीसाठी अर्ज करणाऱ्यांची संख्या आता एकूण ३.३५ कोटी इतकी झाली आहे.